Áætlun um efnistöku

Áður en leyfi er veitt til efnistöku skal liggja fyrir áætlun námuréttarhafa um efnistöku eða lýsing á fyrirhugaðri framkvæmd, afstöðumynd og önnur nauðsynleg gögn um framkvæmdina samkvæmt 7. gr. reglugerðar nr. 772/2012 um framkvæmdaleyfi. Í áætlun um efnistöku skal meðal annars gera grein fyrir magni og gerð efnis, vinnslutíma, hvernig fyrirhugað er að standa að framkvæmdinni og frágangi á efnistökusvæði. Mikilvægt er að vanda vel til verks við gerð áætlunar um efnistöku og leggja fram raunhæfa áætlun um það hvernig ætlunin er að standa að efnistökunni og frágangi að efnistöku lokinni.

Umfang þeirra gagna sem leggja verður fram í áætlun um efnistöku er mjög háð umfangi framkvæmdar. Þegar áætlun um efnistöku er tekin saman er vert að hafa í huga leiðbeiningar við val og skipulagningu á námusvæði og tilhögun efnistöku (sjá nánar hér).   Við gerð áætlunar um efnistöku skal taka mið af umhverfi efnistökusvæðisins og fyrirhugaðri landnotkun í framtíðinni. Við gerð slíkrar áætlunar þarf að gera grein fyrir landslagi og gróðurfari svæðis áður en efnistakan hefst og útliti svæðis að efnistöku lokinni. Hafa skal í huga að ganga þarf endanlega frá efnistökusvæði innan þriggja ára frá því að efnistöku er hætt, nema sérstakar ástæður séu fyrir tímabundinni stöðvun, sbr. 16. gr. skipulagslaga. Í lýsingu á frágangi efnistökusvæðis þarf að koma fram, eftir atvikum, hvernig:

• Meðhöndla á núverandi gróður á fyrirhuguðu efnistökusvæði
• Haga skuli uppgræðslu svæðis þegar efnistöku lýkur
• Komið verði í veg fyrir áfok frá efnistökusvæðinu

Rétt er að benda á samkvæmt reglugerð um framkvæmdaleyfi skal þegar sótt er um framkvæmdaleyfi til efnistöku á svæði þar sem ekki liggur fyrir deiliskipulag fylgja uppdráttur og greinargerð (efnistökuáætlun) þar sem gerð er grein fyrir hinu nýja landslagi á vinnslutíma og að efnistöku lokinni. Í gögnunum skal gerð grein fyrir stærð efnistökusvæðis, vinnsludýpi, magni og gerð efnis sem heimilt er að nýta samkvæmt leyfinu, vinnslutíma og frágangi á efnistökusvæði og yfirborðsefnum sem koma í veg fyrir fok á jarðefnum. Nánar er fjallað um framkvæmdaleyfi og gögn sem þurfa að fylgja með umsókn um framkvæmdaleyfi hér.    Dæmi um það hvernig setja má fram upplýsingar um fyrirhugaða efnistöku með skýrum og myndrænum hætti er að finna á myndinni hér fyrir neðan. Myndin sýnir fyrirhugað efnistökusvæði í klapparholti, sem að mestu leyti er ógróið, í landi Sigluvíkur á Svalbarðsströnd. Efnistökusvæðið er 1,9 hektarar að stærð og er þar áætlað að vinna um 100.000 m³ af efni í tveimur áföngum. Framsetning sem þessi gæti nýst vel þegar um lítið eða meðal stórt efnistökusvæði er að ræða.